A guardarte sempe accussì
È 'na cosa ca nun mme va.
Quacche ghiuorno famme saglì
Quanno mammeta nun ce sta.

Io nun pozzo arrivà a capì
Che carattere tiene tu:
Mo te trovo a chicchirichì,
Mo te trovo a cucchericù.

Quanno vaco pe' te parlà
Sempe 'a vocca mm'aggi' 'a appilà.
Ma putimmo,
Ma putimmo tirà accussì?

"Vene mammema, lete 'a ccà!
Ce sta fratemo, nun guardà!"
A chi santo,
A chi santo vuò fà ammalì?

Pe' 'st'ammore ca sento, oje nè,
'Nu rialo te voglio fà.
Si ll'acciette voglio vedè
Che ne dice mammà e papà.

E vulesse pur'io tenè
'Nu ricordo pe' mm'astipà.
Sissignore, che male nc'è?
'Nu regalo tu mm' 'o può dà.

Tu mme daje 'na cosa a me,
Io te dongo 'na cosa a te
E ll'ammore,
E ll'ammore accussì se fa.

Che nce passa tra me e te,
Manco 'a gatta ll'ha da sapè.
Acqua 'mmocca,
Acqua 'mmocca e lass' 'e pparlà!

Quanno frateto 'appurarrà,
Accummencia: chiacchià, chiucchiù.
Ma 'o rialo po' va a guardà,
Se 'mbriaca e nun parla cchiù.

Accummencia, pe' se 'nquartà,
Pure pateto ca nun vò.
Saglie mammeta p'appurà
E pur'essa fa 'nu "to-tò".

Po' se guardano tutt' 'e ttre
E s'avotano 'nfacci'a te:
"Quann'è chesto,
Quann'è chesto sagliesse ccà".

Tu rispunne: "Se sape, embè,
'Stu rialo v' 'o fa pecché,
Pecché chillo,
Pecché chillo sagliuto è già".