Vocca 'e Napulitana, quanno vase,
'E vase ca saje dà songo 'nfucuse.
Vaso ca percia 'o core e ca nce trase,
Nce sò cadute ll'uommene scuntruse.
Vocca 'e Napulitana, pe' 'sti vase.

Napulitana mia, Napulitana,
È 'nu destino!
Te maledico si te sto vicino,
Si staje luntana.
Penzanno â vocca che t'addora 'e rrose,
Io desse tutt' 'a vita pe' 'nu vaso.

Uocchie 'e Napulitana, appecundruse,
'Na sciamma dint' 'o core m'îte miso.
Vuje site nire, fute, misteriuse,
E date 'o 'Nfierno e date 'o Paraviso.
Uocchie 'e Napulitana, appecundruse.

Napulitana mia, Napulitana,
È 'nu destino!
Te maledico si te sto vicino,
Si staje luntana.
Pe' 'na guardata 'e 'st'uocchie misteriuse,
Sarria cuntento pure 'e murì acciso.

Trezze 'e Napulitana, trezze appese,
Dint'a 'sti ttrezze 'o core m'îte 'nchiuso.
E nun fa niente, stella 'e 'stu paese,
Tieneme strinto, nce aggio fatto ll'uso,
Dint'a 'sti ttrezze nere nere, appese.

Napulitana mia, Napulitana,
È 'nu destino!
Te maledico si te sto vicino,
Si staje luntana.
P'avè 'nu cierro 'e 'sti capille 'e raso,
Io nce turnasse a pere a 'stu paese.

Napulitana mia, Napulitana!