Si tu vulisse ca i' fermasse 'a luna
O jesse 'ncielo a scippà ll'oro a 'o sole,
O te cuntasse 'e stelle a una a una,
O t'astipasse 'addore d' 'e vviole,
Si me dicisse: Pesca dint' ô mare
Tutt' 'e tesore, i' rispunnesse: no;
Sò cose ca se diceno e me pare
Ca chi vò bbene lusingà nun pò!

Ma si me dice i' che facesse maje
Doppo ca fusse morta, i' murarria!…
Pecché te voglio bbene, e tanto assaje,
Ca 'nziem' a tte fernesse 'a vita mia…
T' 'o ddico senza scegliere 'e pparole,
E senza giuramente, e accussì è…
Nun c'è bisogno 'e scippà ll'oro a 'o sole,
Quanno 'stu core fuje sceppato 'a te!