Vuje vulite ca i' canto 'a canzona
Ca cantava, 'na vota, 'a matina…
Nun sapite ca dorme Rusina?
Sta sunnanno e n' 'a voglio scetà!

I' nun voglio cantà,
Nun 'a voglio scetà.
Pe' 'sta rosa suspira 'stu core:
Rosa dorme e nun voglio cantà!

D' 'a chitarra s'è rotta 'na corda…
Ma cchiù tarde se sceta Rusina
E 'na corda nce metta cchiù fina:
Ch' 'e capille me ll'ha da 'ntrezzà!

I' nun voglio cantà,
Nun 'a voglio scetà.
Pe' 'sta rosa suspira 'stu core:
Rosa dorme e nun voglio cantà!

Quanno tengo 'sta rara chitarra,
I' mme sceto cu ll'arba vicina:
Quanno arap' 'a fenesta Rusina,
Tocco 'e ccorde e mme metto a cantà!

Mò nun voglio cantà,
Nun 'a voglio scetà…
Pe' 'sta rosa suspira 'stu core:
Rosa dorme e nun voglio cantà!