Quant' è bello 'stu balcone chino 'e sciure,
'Sta fenesta chiena 'e rrose rampicante!
Spicialmente quanno po' t'affacce e cante
Che delizia si putesse stà cu tte!
'Mmiez' ê rrose e 'mmiez' ê sciure,
'Nziem' a tte cantasse i' pure.

Voglio cantà cu tte
'Mmiez' a 'sti rrose,
E te voglio vasà
Musso 'e cerasa,
Pecché 'ammore chesto vò,
Pecché 'ammore chesto vò:
Canzone, sciure e vase!

Quann' arracque tu chest' evera addirosa,
P' 'o prufumo ca se spanne, io sent' 'addore.
Addimmanne che te cerca chist' ammore,
Te risponne: "Vienetenne 'mbracci'a mme!"
E te faccio 'nu grillaggio:
Fronne, sciure e rrose 'e maggio.

Voglio cantà cu tte
'Mmiez' a 'sti rrose,
E te voglio vasà
Musso 'e cerasa,
Pecché 'ammore chesto vò,
Pecché 'ammore chesto vò:
Canzone, sciure e vase!

Tutta Napule me pare 'nu ciardino…
Beneditto chi nce nasce a 'stu paese.
Senza sole nun ce sta nisciuno mese,
Senz' ammore 'na figliola nun pò stà.
Nce mettesse 'na curona:
Sciure, vase e 'na canzona.

Voglio cantà cu tte
'Mmiez' a 'sti rrose,
E te voglio vasà
Musso 'e cerasa,
Pecché 'ammore chesto vò,
Pecché 'ammore chesto vò:
Canzone, sciure e vase!