Figliole meje, redite,
Cantate juorno e sera!
E comme nun sentite
'A voce 'e primmavera?!

Porto tutt' 'e mmatine
Caruofane scarlatte,
Camelie e giesummine
E rose 'ncappucciate,
Ma pe' Catarenella,
Ca addora 'e malvarosa,
Tengo 'aruta nuvella
E ll'evera addirosa.

Quanno sò chisti mise,
Ca 'o sole va p' 'e case,
'Sti juorne 'e Paraviso
Tu te magnasse 'e vase.

Tengo 'na testa 'e menta
E tre vasenicola
Ca chi ll'addore sente
Overo se cunzola.
Ma pe' Catarenella,
Ca addora 'e malvarosa,
Tengo 'aruta nuvella
E ll'evera addirosa.

Saglieno p' 'a campagna
Cantanno li figliole,
E aret' a 'na muntagna
Redenno sponta 'o sole.

Tiempe felice e belle,
Site aspettate 'a tutte
P' 'e sciure e ll'aucielle
E pe' pruvà dduje frutte.
Ma pe' Catarenella,
Ca addora 'e malvarosa,
Tengo 'aruta nuvella
E ll'evera addirosa.