Quann' 'ammore tuzzuleja
'Nfacc' 'e llastr' 'e 'stu balcone,
Doce doce, 'na canzona
Te vò sentere cantà…
E, cu tutt' 'e llastre 'nchiuse,
Zitto zitto, 'ammore trase…
E me pare 'e sentì, quase,
Ca tu cante affianc' a mme:
– 'Ammore è comm' 'a scala d' 'e pumpiere:
S'allonga, s'accorta,
S'acala, s'aiza…
E se 'mpizz' addò cchiù le piace
Quann' 'a femmena dice ca sì!…

'Nu cardillo 'nnammurato
Cant' 'o stesso riturnello
E po' dice: – Ammore è bello,
Quanno ride 'a giuventù!… –
'Stu cardill' è 'o core mio
Ca mò sta 'int' â cajola,
Comm' a tte, ca sì figliola,
E te manc' 'a libbertà!…
'Ammore è comm' 'a scala d' 'e pumpiere:
S'allonga, s'accorta,
S'acala, s'aiza…
E se 'mpizz' addò cchiù le piace
Quann' 'a femmena dice ca sì!…

Quanta vote me n'addono,
Ca me guard' e ca suspire,
Pe' tramente 'st'uocchie nire
Vonno dicere accussì:
– Chist' ammore secutato,
Sient' a mme, ca nun è cosa…
'Ncopp' â testa, 'a meglia rosa,
Nun 'a voglio fà seccà!… –
'Ammore è comm' 'a scala d' 'e pumpiere:
S'allonga, s'accorta,
S'acala, s'aiza…
E se 'mpizz' addò cchiù le piace
Quann' 'a femmena dice ca sì!…