"Santanotte!"… 'Nu saluto a 'sta fenesta
Addò 'a luna, cu 'na festa,
Tutt' 'argiento ha spaso già!

Quaccheduna sta scetata
E s' 'a passa a sbarià,
Pecché 'o suonno ll'ha lassata,
Tale e quale comm'a mme!

Vi' che triato
Ch'è 'a vita nosta!
Dò 'a "Santanotte"
A chi m'ha 'ntussecato.

Scinne, oje bella, ca stò senza cumpagnia:
M'ha levato mamma mia
'O curtiello 'a cuollo a mme!

Ccà me porta 'o bbene antico…
– Sta cu 'n'ato? E ch'aggi' 'a fà?
Sò turnato 'int'a 'stu vico
Pe' murì si aggi' 'a murì!

Torna cu mmico!
Te voglio bbene.
Po' 'a "Santanotte"
'A dammo a chist'amico.

Tu sì scesa, finalmente! Me sentive?
E dimmello: cu chi stive?
Dimme 'o nomme, primm' 'e mò!

Ma tu cade? Staje gelata…
Parla!… Ah!.. È sango 'mpiett'a tte.
Me ll'ha accisa 'o scellarato…
Morta io 'a stregno 'mbracci'a mme.

Povero core,
T'hanno spezzato…
'Sta "Santanotte"
Mò ll'ha dda avè chi more!

Ma primma 'e juorno, 'o 'nfamo ha dda murì!