Bella figliola ca staje 'ncopp' ô monte,
Stanotte 'ncopp' ô monte sò sagliuto.
Stanotte 'mmiez' ô monte aggiu chiagnuto
E chelli pprete ll'aggiu 'nfose 'e chianto.

T'aggiu chiammata e 'o nomme s'è perduto,
Pecché 'sta voce 'o viento s' 'a purtata.
E me ne songo sciso triste e muto:
Ma 'ncopp' ô monte ll'anema è restata!

Bella figliola cu 'a faccella 'e santa,
Aggiu lassato 'o mare e sò venuto
'Ncopp'a 'stu monte e me nce sò sperduto
Comme nce s'è sperduta tanta gente!

T'aggiu chiammata e 'o nomme s'è perduto,
Pecché 'sta voce 'o viento s' 'a purtata.
E me ne songo sciso triste e muto:
Ma 'ncopp' ô monte ll'anema è restata!

Bella figliola, si te vene a mente,
A vvespero, 'na varca e 'o marenaro,
Scinne da 'o monte e cercalo p' 'o mare
Chi, spierto dint' â varca, aspetta e canta.

T'aggiu chiammata e 'o nomme s'è perduto,
Pecché 'sta voce 'o viento s' 'a purtata.
E me ne songo sciso triste e muto:
Ma 'ncopp' ô monte ll'anema è restata!