Comm' è ceniero 'o sole stammatina!
E comme vaco lieggio a falcià grano!
Tenesse 'o core 'e farne 'na fascina,
Abbasta ca luvasse priesto mano!…
Comm' è ceniero 'o sole stammatina!

Sarrà ca 'mmiez' ô bosco,
Pe' sott' ê ffresche frasche,
Ogge, 'a vutata 'o ffrisco,
Nenna m'aspetta pe' legna tagliare!

Aissera lle dicette: – Pe' ffavore,
Che prezzo fa ll'ammore 'e 'na massara?
Chisti bbellizze toje vanno tesore,
Ma io 'na vitella tengo ca m'è cara…
…E pigliatella, ca me faje ffavore…

Abbasta ca p' 'o bosco,
Pe' sott' ê ffresche frasche,
Verso 'a vutata 'o ffrisco,
Me daje 'nu poco 'sta vocca a vasare!

Bon véspero, cummà, nun c'è risposta?…
Forse chello ca dico, nun è gusto?…
Me rispunnette: – Ammore niente costa,
Quanno 'nu 'nnammurato te da gusto.
Bon véspero, cummà, chest' è 'a risposta:

Venite 'mmiez' ô bosco,
Pe' sott' ê ffresche frasche,
Dimane, verso 'o ffrisco,
Ca tutto faccio pe' ve cuntentare…