Cielo napulitano,
Te penzo e te desidero
Mò ca te sto luntano.
Me sonno 'e stelle,
Me sonno 'e nuvole,
Me sonno 'a luna, lucente e pallida,
D' 'e notte belle.

Alba e tramonto; tutto me sonno,
E veco Napule, chiagnenno, 'nzuonno.

Io voglio 'o cielo mio,
Io voglio 'o mare mio
Pecché nun sò cchiù io
'A quann' 'o sole 'e Napule
Nun me fa luce cchiù…

Voce napulitana,
Damme nutizia e parlame
D' 'a terra mia luntana.
Che ffa Maria?
Nun me vò scrivere?
Mammella, 'o sacio, s' 'a passa a chiagnere,
Mammella mia.

Prega 'a Madonna d' 'o Buon Cunziglio
Ca le scanzasse "'stu ricco figlio".

Io voglio 'o cielo mio,
Io voglio 'o mare mio
Pecché nun sò cchiù io
'A quann' 'o sole 'e Napule
Nun me fa luce cchiù…

I' moro 'e passione
Si penzo ch'a Pusilleco
Se cantano 'e ccanzone,
E i' sto luntano,
Sto fore Patria,
Ma cchiù me sento – mò ca sto all'estero –
Napulitano.

Napule, Napule, me n' 'e cacciato,
Ma i' torno… e torno cchiù 'nnammurato.

Io voglio 'o cielo mio,
Io voglio 'o mare mio
Pecché nun sò cchiù io
'A quann' 'o sole 'e Napule
Nun me fa luce cchiù…