M'aggio fatto buono 'o cunto,
M'aggio fatto buono 'o cunto…
Tutto è pronto.
Nun ce manca proprio niente,
Nun ce manca proprio niente!…
Tutto è pronto…
Però 'a casa sulamente,
Però 'a casa sulamente
Nun è pronta.
Lietto, mobili, contanti,
Lietto, mobili, contanti
Nun sò pronte.

Ma, p' 'o riesto, alleramente,
Stammo a posto, Catarì!

Catarì,
Pronto è 'o core pe' 'stu core?
Pronta è 'a vocca pe' 'sta vocca?
E a chi aspiette? Ca si attocca
Può chiammà pur' 'a vammana,
Ca p' 'a fine 'e 'sta semmana…
Tutto è pronto!

Fracco, tubo, scarpe e guante,
Fracco, tubo, scarpe e guante…
Tutto è pronto!
E 'nu bello portinfante,
E 'nu bello portinfante…
Pure è pronto…
Ma si esce otto e nuvanta,
Ma si esce otto e nuvanta,
Tutto è pronto,
Ca si no, per il momento,
Ca si no, per il momento,
Nun sò pronto.

Ma, p' 'o riesto, alleramente,
Stammo a posto, Catarì?

Catarì,
Pronto è 'o core pe' 'stu core?
Pronta è 'a vocca pe' 'sta vocca?
E a chi aspiette? Ca si attocca
Può chiammà pur' 'a vammana,
Ca p' 'a fine 'e 'sta semmana…
Tutto è pronto!

I' nun tengo 'o riesto 'e niente,
Tu nun tiene 'o riesto 'e niente…
Tutto è pronto…
'Na culliera cu 'e brillante,
'Na culliera cu 'e brillante
Pure è pronta.
Ma però tu 'e ttiene 'nfronte,
Ma però tu 'e ttiene 'nfronte,
Belle e pronte.
Ce vò ll'oro? E i' tengo 'o dente
Ca m' 'o 'mpigno, e dint' a niente
Tutto è pronto!

Ma, p' 'o riesto, alleramente,
Stammo a posto, Catarì!…

Catarì,
Pronto è 'o core pe' 'stu core?
Pronta è 'a vocca pe' 'sta vocca?
E a chi aspiette? Ca si attocca
Può chiammà pur' 'a vammana,
Ca p' 'a fine 'e 'sta semmana…
Tutto è pronto!