Te vurria tenè sola
'Nchiusa dint' a quatto mura,
C' 'o cardillo 'int' 'a cajola…
C' 'a fenesta chien' 'e sciure.
E tenerte 'ncopp' 'o core
Doce doce abbandunata!
E parlannote d'ammore
Ll'ore sane fà passà!

Tutta mia! Tutta mia!
Tutta mia anema e core!
Tu nce pienze che sarria?…
Che sarria pe' mme e pe' tte?
Ah!… Ah!…
Tutta mia!…

Te vurria a mano a mano
Purtà addò se va sicuro:
Comme fosse: 'mmiez' 'o ggrano…
Quann' 'o ggrano è già maturo!
E tenerte astrinto astrinto,
Comm' a serpe arravugliato,
Pe' trasì… trasì cchiù dinto…
Dint' 'o core, 'mpiett' a tte!

Tutta mia! Tutta mia!
Tutta mia anema e core!
Tu nce pienze che sarria?…
Che sarria pe' mme e pe' tte?
Ah!… Ah!…
Tutta mia!…

Te vurria abbascio 'a cantina:
Nun te dico tutt' 'e nnotte,
Ma 'na vota, e sia matina.
T'aspettasse aret' 'e vvotte!
No p' 'o vino… – Chi ne tocca? –
Ma cu ttico a musso a musso!
Tutt' 'o mmele 'e chesta vocca
Me zucasse c' 'o vvassà!…

Tutta mia! Tutta mia!
Tutta mia anema e core!
Tu nce pienze che sarria?…
Che sarria pe' mme e pe' tte?
Ah!… Ah!…
Tutta mia!…