Tarantella d' 'a pace

(1945)

music: Vincenzo D'Annibale,
lyrics: Raffaele Chiurazzi.
Instrumental version


Stammatina mme sò scetato
Tanto allero, saccio pecché,
E 'stu core m'ha cunfidato
'Nu segreto buono pe' mme.

Nientemeno ca 'n'atu ppoco
La Germania dichiarerà
Ch'è sconfitta e se stuta 'o ffuoco
Che distrugge l'umanità.
Tu ce pienze, Carmè, a 'sta pace
Ca ce porta 'a felicità.
E ride Napule allera,
'E lluce vide appiccià,
E tu, ca nun sì sincera,
Acquiste sincerità.

'Stu bbene ardente e semplice
Cchiù ddoce se farrà,
E 'a pace 'e tutt' 'e popole
C' 'o sole 'nfronte ce fa riturnà.

Nun appena è firmata 'a pace,
Dammo sotto pe' ce spusà,
E 'sta vocca ca me piace
Cchiù buscie nun diciarrà.

Tutt' 'e strate lucente e chiare
Sott' ô vraccio vulimmo fà,
Ce ne jammo vicino ô mare
Cu 'na luna che fa sunnà.
Tratturie cu l'ustricare,
'A pusteggia torna a cantà,
'Nu piano sona ô puntone,
'Na folla che vvene e vva,
'Na loggia, po' 'nu barcone
A ffesta vide allummà.

'E mmane siente sbattere
Pe' chi ritorna ccà,
E 'a pace 'e tutt' 'e popole
C' 'o sole 'nfronte ce fa riturnà.

'E mmane siente sbattere
Pe' chi ritorna ccà,
E 'a pace 'e tutt' 'e popole
C' 'o sole 'nfronte ce fa riturnà.