Sott' â fenesta toja mme sò fermato
Pe' 'na casualità.
Nun credere ca i' fosse riturnato,
Ca 'o tiempo acconcia tutto e ffa scurdà.

Io mme songo sanato! È 'n'anno sano
Ca nun te penzo cchiù,
'Na vota nun rijevo a stà luntano,
'Nu juorno sulo! Ll'hê vuluto tu!

Bonasera! – io dico e passo –
Bonasera, Cuncettè!
Io mme levo 'o cappiello,
Io faccio passo.
Me sta aspettanno 'n'ata
E chella fa pe' mme!

Siscanno passo comm'a tiempo antico
Quanno chiammavo a tte.
Ma ammore mò ha cagnato casa e vico,
Retirete ca tu nun faje pe' mme!

Io passo e canto vocca bella 'e rosa,
Comme tu saje vasà,
E nun me fà 'a sprezzante, nun è cosa,
Si pure passo e pe' casualità.

Bonasera! – io dico e passo –
Bonasera, Cuncettè!
Io mme levo 'o cappiello,
Io faccio passo.
Me sta aspettanno 'n'ata
E chella fa pe' mme!

Pe' m'appiccià 'o sigaro ccà sò stato.
Chesto te voglio dì.
Ma pe' 'nu sfizio 'a ggente m'ha 'nfurmato:
Cuncettella d'allora sta accussì!

Io rido, canto e mme ne veco bbene
Ca nun te penzo cchiù,
Ca 'n'ata m'ha levato a dint' ê ppene,
Vaco da essa! Ll'hê vuluto tu!

Bonasera! – io dico e passo –
Bonasera, Cuncettè!
Io mme levo 'o cappiello,
Io faccio passo.
Me sta aspettanno 'n'ata
E chella fa pe' mme!