Guardate ccà mia moglie che m'ha fatto:
M'ha muzzecato 'o naso dint' arraggia,
Po' m'ha sceppata 'a faccia comm' a gatta,
Dicenno: piezzo 'e ccà e piezzo 'e llà!
E tutto chesto ccà p' 'a gelusia…
Quant' è gelosa Squacchiusella mia!

Po' se ne vene e dice,
Ca i' nun 'a curo cchiù,
Che sò stufato d'essa…
E ca cchià cchià e cchiù cchiù…
I' nun me sò stufato;
Sò semp' affezzionato,
Forse sarrà stuf' essa;
Ma i' songo semp' 'o stesso!

Io 'a voglio bbene cchiù d' 'a vita mia…
Lo giuro sulla fossa di mia madre…
Ave raggione a essa e 'a simpatia!
(Mia moglie è bella, rassomiglia a me)
Perché succedon sempre queste cose?
Ca simmo piccerille e freschi sposi.

Po' se ne vene e dice,
Ca i' nun 'a curo cchiù,
Che sò stufato d'essa…
E ca cchià cchià e cchiù cchiù…
I' nun me sò stufato;
Sò semp' affezzionato,
Forse sarrà stuf' essa;
Ma i' songo semp' 'o stesso!

Comm' 'a cumbino mò c' 'o naso rutto,
Nun pozzo addurà cchiù nisciuna cosa!
I' songo bello e debbo sembrar brutto;
Ma 'un c'erano ati pizzi p'afferrà?
Le vac' 'a dì: Fifì, damme 'nu vaso,
E invece aggio 'nu muorzo 'ncopp' 'o naso!

Mò va dicenno pure
Ca nun 'a curo cchiù,
Ca sò stufato d'essa
E ca cchià cchià e cchiù cchiù…
I' nun me sò stufato;
E ve l'ho dimostrato!
Or ditemi voi stessi
Si sò stuf' i' o è stuf' essa!