Neapolitan Songs - Serenatella nera

Serenatella nera

(1903)

music: Eduardo Di Capua, Salvatore Gambardella,
lyrics: Ferdinando Russo.
Instrumental version


Sulagna è 'a strata, sulagno è 'o core,
E 'st'uocchie chiagnere nun ponno cchiù…
'O cielo è niro… tutt' è dulore!…
A 'sta fenesta nce manche tu!

Ah, si putisse 'ntennere,
Core ca nun me siente,
'O strazio e 'sti lamiente
Ca ll'anema te dà,
Te sentarrisse movere
Tutt' 'a cumpassione,
Pe' chesta passione
Ca disperà me fa!

Da 'o core amaro, p' 'o cielo niro,
Vanno 'e suspire penzanno a tte…
P' 'a via sulagna, tristo e sperduto,
Resto speruto de te vedè.

Ah, si putesse 'st'anema,
Ca nun me vò cchiù bbene,
Cunziderà li ppene
Ca 'o core tujo me dà,
Se sentarria cummovere
Tutt' 'a cumpassione,
Pe' chesta passione
Ca disperà me fa!

Tu nun me siente! 'Mmiez' a 'sta via
Me rieste a sbattere, sulo, accussì,
Ma tutt' 'e nnotte 'st'anema mia,
Cu 'nu suspiro, t' 'o vvene a dì:

Te voglio bbene! E 'st'anema,
Ca nun t'ha fatto niente,
'O strazio e 'sti lamiente,
Cu 'o sango sujo te dà,
Speranno 'e te cummovere
Tutt' 'a cumpassione,
Pe' chesta passione
Ca disperà me fa!