Neapolitan Songs - Sciuldezza bella

Sciuldezza bella

(1897)

music: Giuseppe Febbraio,
lyrics: Giovanni Marsicani.
Instrumental version


Nun mme ne curo, oje nè, ca m'hê traruto,
Tengo pe' 'nzegna la sciuldezza bella,
Quanno 'sta guappa cosa aggiu saputo
M'aggio rattato chesta capuzzella,
E 'mbracci'a Rosa, 'a lavannara mia,
Se n'è fujuta, overo, 'a pucundria!

Fronn' 'e limone mia, fronn' 'e limone,
Voglio spassarme mò ca sò guaglione;
Fronna d'aruta mia, fronna d'aruta,
Povera a tte, Carmè, ca sì caruta!

Mò mme sò miso cu 'na craparella,
Ch'è proprio 'n'angiulillo 'e Paraviso:
Tene 'nu bellu nomme: Cuncettella,
Te fa 'ncantà cu chillo pizzo a riso;
Facimmo ammore 'ntra li sciure 'e rose,
'Mmiez' a 'nu campo d'evere addirose.

Fronn' 'e limone mia, fronn' 'e limone,
Voglio spassarme mò ca sò guaglione;
Fronna d'aruta mia, fronna d'aruta,
Povera a tte, Carmè, ca sì caruta!

Sciore, sciurillo nuovo 'e primmavera
Ca spunte 'ncopp' a ll'albero d'ammore,
Voglio pigliarme a tte comm' â mugliera
Pe' farme 'nzuccarà sempe 'stu core.
Cu 'sta serata doce e accussì bella
Mme voglio 'nzuccarà cu Cuncettella.

Fronn' 'e limone mia, fronn' 'e limone,
Voglio spassarme mò ca sò guaglione;
Fronna d'aruta mia, fronna d'aruta,
Povera a tte, Carmè, ca sì caruta!