Don Ciccì, che puorte 'ncanna,
'Sto majateco cannale,
Tu me pare tal' e quale
'Na garsella o 'no chinchè.
Tu lo saje ca la garsella
S'ave spisso da smiccià;

Don Ciccì,
Scinne, scì, 'sta cazettella
Ca lo tubo può schiattà.
Scinne, scì,
Don Ciccì,
Ca lo tubo può schiattà.

E lo tubo, che a la sgherra
Puorte 'ncapo 'ntutte ll'ore,
Pare tubo de vapore
Che lo fummo ha da caccià.
Chesta moda non è bella,
È 'na smorfia 'nverità;

Don Ciccì,
Scinne, scì, 'sta cazettella
Ca lo tubo può schiattà.
Scinne, scì,
Don Ciccì,
Ca lo tubo può schiattà.

Co ccazune curte e stritte,
Lo soprabeto zucato,
Tu me pare addeventato,
Sciosciammocca, Don Ciccì.
Vì ca cchiù de 'na nennella
Te sta proprio a cuffià;

Don Ciccì,
Scinne, scì, 'sta cazettella
Ca lo tubo può schiattà.
Scinne, scì,
Don Ciccì,
Ca lo tubo può schiattà.

Vanno ll'uommene a la moda
Comm' a spruccolo mo sicche,
E la femmena, palicche
Pe' mmarito non ne vò.
Si trovà vuò 'na sposella
Tu 'sta moda haje da cagnà;

Don Ciccì,
Scinne, scì, 'sta cazettella
Ca lo tubo può schiattà.
Scinne, scì,
Don Ciccì,
Ca lo tubo può schiattà.