Surdato ca saje scrivere
E c' 'a passiona toja tiene sigreta,
Cunzidera, cunzidera
'O povero cumpagno ch'è alfabeta,
Ca pe' mannà 'na lettera
'A 'nnammurata soja, 'stu 'nnammurato,
Chello ca lle vò dicere
Ll'addà cuntà pe' fforza apprimm' a 'n'ato!
Bella ca staje luntana,
Si 'ncopp' a 'stu fuglietto
Chello ca penzo nun te ll'aggio ditto.
Tu 'o ssaje ca sto suggetto,
Ca è stata 'n'ata mana
Ca ll'ha scritto!

'Nu capurale 'e Napule
C'ha fatto tutt' 'e scole ginnasiale,
Già m'ha 'mparato 'e nummere,
Già m'ha 'mparato a leggere 'e vvucale…
E 'a sera se sacrifeca;
Ha prummettuto a 'stu scularo sujo
Ca lle 'mparava scrivere
Dint' a tre o quatto sere, 'o nomme tujo!
Bella ca staje luntana,
Si 'ncopp' a 'stu fuglietto
Chello ca penzo nun te ll'aggio ditto.
Tu 'o ssaje ca sto suggetto,
Ca è stata 'n'ata mana
Ca ll'ha scritto!

Mme sò 'mparato a scrivere
E ll'aggio fatto 'a primma cartulina
Io stesso, cundicennole:
"Mia dorge e affezionata Catarina,
Mò songo 'n'ommo 'e lettere
E a chistu core ardente chi 'o mantene
Quanno me dice: scrivele,
Dincello 'n'ata vota c' 'a vuò bbene!"
Bella ca staje luntana,
Mò 'ncopp' a 'stu fuglietto
Chello ca penzo, chiaro ll'aggio ditto;
Nun stongo cchiù suggetto,
Nun è cchiù 'n'ata mana
Ca ll'ha scritto!