Neapolitan Songs - Pusilleco e Suriento

Pusilleco e Suriento

(1908)

music: Ernesto De Curtis,
lyrics: Giambattista De Curtis.
Instrumental version


I' sto a Surriento: 'O sole se n'è sciso,
'Na striscia 'e luce 'nc'è rimasta ancora…
Se legge chiaro tutt' 'o Scoglio 'e Friso;
'E lume già se vedeno 'e tremmà.
I' penzo: Rosa mia mò se retira,
È ll'ora ca i' vaco pe' fà 'ammore,
Va trova si me penza e si suspira
E si addivina ca i' stongo ccà.

Rosa, Rosa!
Pe' 'mmiezo nce sta 'o mare… e nun è ccosa…
Si scenne 'o maistrale 'int' â nuttata,
Mollo 'o trinchetto e a ghiuorno sto cu tte.

Da 'o Scoglio 'e Friso i' veco 'o sole ch'esce:
'Ncoppe Surriento è 'na sfrunnata 'e rose,
'O sole cchiù s'aiza e 'a luce cresce,
Abbaglia 'a vista e nun se fa guardà!
I' penzo: 'Mmaculata mò se sosa,
Arape 'a fenestella e guarda 'o mare:
Va trova si me penza e si è gelosa…
E si addivina ca i' stongo ccà?!

'Mmaculata!
'Sta varca mia a Pusilleco è 'nchiummata!…
Si 'ncasa 'stu grecale, i' mollo 'a cimma
E dinto a nniente stongo 'mbracci'a tte!