Neapolitan Songs - Primmasera

Primmasera

(1927)

music: Ernesto De Curtis,
lyrics: Raffaele Chiurazzi.
Instrumental version


Suspire sott' a ll'albere
D' 'a Villa a primmasera;
Fronne ca murmulejeno
C' 'o sciato 'e primmavera.
Sedile 'ncopp' a ll'evera
Rimasta scarpesata,
Terreno ancora smuoppeto
Pe' ll'acqua d' 'a vernata…
Diciteme si chella vesta corta
Torna sott' a 'sti ffronne a cumparè?
Faciteme sapè si è viva o morta,
Si sta luntano e penza ancora a mme!

Fuje niente. Fuje 'na 'nziria
Ca ce spartette a nuje
'Na sera ca nun ghievemo
D'accordo tutt' 'e dduje.
E chella sera stettemo
Fermate cchiù de 'n'ora,
Cu ll'uocchie chine 'e lacreme
(Me l'arricordo ancora!)
Diciteme si chella vesta corta
Torna sott' a 'sti ffronne a cumparè?
Faciteme sapè si è viva o morta,
Si sta luntano e penza ancora a mme!

Eppure, nuje putevemo
Fà pace dint' a niente.
Bastava ca ce avessemo
Guardate sulamente.
Ma nun ce fuje pussibile!
Essa, scuntenta e sola,
S'alluntanaje cchiù pallida,
Ma senza 'na parola!
Diciteme si chella vesta corta
Torna sott' a 'sti ffronne a cumparè?
Faciteme sapè si è viva o morta,
Si sta luntano e penza ancora a mme!