Paese che 'ncatene!

(1919)

music: Ernesto De Curtis,
lyrics: Ernesto Murolo.
Instrumental version


Sto fore Napule,
Nun tengo palpite:
Ll'amice, 'e ffemmene,
'Na cena a ll'aria…
Che libbertà!
Strate nove, gente nova,
Parlatura furastera,
Pur' 'a luna veco, 'a sera,
Meglio 'e Napule spuntà…

Paese che 'ncatene,
Te lasso pe' dispietto 'e chistu core,
Felice 'e te lassà;
E me ne rido 'e chi, pe' simpatia,
Quanno te sta luntano, vularria…
'N'auciello addeventà.

Sto fore Napule!
Nu' cchiù Pusilleco
C' 'o mare soleto,
Cu 'a varca a cconnola
Pe' nun durmì!…
Che ne faje chisti bbellizze
Ca 'na spina dint' ô core,
Ca, si 'a tuocche, fa delore,
Si t' 'a scippe… può murì?…

Paese che 'ncatene,
Te lasso pe' dispietto 'e chistu core,
Felice 'e te lassà;
E cu 'sti bell' amice 'ncumpagnia,
'Sta vita, ca me resta, vularria
Luntano 'a tte passà!

Pecché se scetano
Tutt' 'e cchiù tiennere
Ricord' 'e Napule?
Chiagneno… diceno:
"Te fid' 'e stà?
Che ne saje si, 'a tte luntano,
Chi te dà turmiente e pene,
S'è cagnata e te vò bbene?
Che ne saje?… Te fid' 'e stà?…"

Paese che 'ncatene,
Te lasso pe' dispietto 'e chistu core,
Felice 'e te lassà…
E mò… stanotte… – che malincunia! –
Stanotte, ardentamente, vularria
'N'auciello addeventà!

Paese che 'ncatene!