Pascaleniello, 'o russo, è 'nnammurato
'E 'Ngiulinella, 'a rossa, d' 'o Mercato:
Sò dui mellune 'e fuoco, dui vrasiere,
Ca p' 'e stutà nun bastano 'e pumpiere.
Pascaleniello è 'o primmo chiappo 'e 'mpiso,
E tutt' 'e notte dorme fore casa;
Ma a 'Ngiulinella, 'a rossa, l'ha prummiso
Ca se l'ha da spusà senz' 'a cammisa.

E 'stu russo a 'sta rossa
Tutt' 'e ssere lle fa 'a tossa
E se fanno, a musso a musso,
'Nu cuncierto in chiave 'e basso:
– Pascali? – 'Ngiulinè.
– Statte accussì! – Moro pe' tte!

Comm' è addurosa e fresca 'a muscarella,
Accussì addora 'a vocca 'e 'Ngiulinella.
Ma Pascalino, pe' campà cuntento,
Vulesse assaggià 'st'uva ogne mumento.
E 'a chiamma e dice: Oh dorge mia bardascia,
Minete 'int' a 'sti braccia 'a coppa abbascio,
Se no, con le mie gambe di camoscio,
Saglio e te segno 'a faccia cu 'a cravascia!

E 'stu russo a 'sta rossa
Tutt' 'e ssere lle fa 'a tossa
E se fanno, a musso a musso,
'Nu cuncierto in chiave 'e basso:
– Pascali? – 'Ngiulinè.
– Statte accussì! – Moro pe' tte!

L'ammore spantecato è 'na gran cosa,
Quanno s'attoppa 'a femmena fucosa…
E Pascalino, 'o russo, ch'è deritto
Vò spantecà d'ammore dint' ô stritto…
E aiere, al troppo affetto sviscerato,
'N'aniello pe' ricordo l'ha cercato,
'Ngiulina, 'ntenneruta, ce l'ha dato
E isso stammatina s' 'a 'mpignato.

E 'stu russo a 'sta rossa
Tutt' 'e ssere lle fa 'a tossa
E se fanno, a musso a musso,
'Nu cuncierto in chiave 'e basso:
– Pascali? – 'Ngiulinè.
– Statte accussì! – Moro pe' tte!