'O rusecatore
(1896)
music: Vincenzo Valente,
lyrics: Pasquale Cinquegrana.
Roberto Murolo
(1912 – 2003)
E chist' è 'n'atu bello galantomo,
Chisto ch'è asciuto mò… 'stu signurone!…
Cantava litanie dint' 'o Duomo,
E mmò è tutt' isso 'ncopp' 'a Sezzione.
E ppappa bene! Caspita!
Protegge a cchisto e a chille…
A chi sta in piazza e tene
'E pise scarzulille…
A chi è preggiudicato…
A quacche patriota,
Che è stato carcerato,
Pe' truffa, cchiù 'e 'na vota!
Faccio buon'io, sentite,
Ca nun me 'ntrico 'e niente…
Vuless' 'o cielo e 'a ggente
Facesse comm' a mme!
Chist' auto pure parla… Ih, che piacere!
Affitt' 'e stanzulelle… aunestamente…
Isso va secutanno 'e cammarere,
E 'a moglie e 'a figlia alloggen' 'e studiente.
D' 'e trastulante chisto
Overamente è 'a crema…
E ttene per pagare
Un ottimo sistema…
Fa 'mpupazzà 'a mugliera…
Le dice ddoje parole…
'A fà j' 'nnanze e arreto,
E ottiene ciò che vuole…
Faccio buon'io, sentite,
Ca nun me 'ntrico 'e niente…
Vuless' 'o cielo e 'a ggente
Facesse comm' a mme!
Chi vene, teh!… Levammoce 'a ccà fore…
Si no, mò vene 'o juorno d' 'o giudizio…
Statev' attiente; chisto è ghiettatore!…
Grattateve, ca nun è pregiudizio…
Quando sposò don Giulio,
Chisto l'accumpagnaje!…
Passaje 'o pover' ommo
'Nu sacco e 'mmiez' 'e guaje…
Perdette pure 'a chiave
D' 'o segretè d' 'a sposa…
E ppe' tre ghiuorne 'e seguito
D'aprirlo non fu cosa!…
Faccio buon'io, sentite,
Ca nun me 'ntrico 'e niente…
Vuless' 'o cielo e 'a ggente
Facesse comm' a mme!