Amice! Me scusate si ve lasso,
'O vico sta 'nfestino e, chi capisce,
Tuorto nun me pò dà, me cumpatisce:
Sposa chi m'ha vuluto bbene a mme!
Jastemmo e smaledico
'Sta femmena busciarda e dispettosa.
Mm'aggio spartuto 'o suonno cu 'n'amico,
E chist'amico, mò, è chillo ca s' 'a sposa!

Parole ddoce… frennesia… suspire…
E 'na catena 'e vase longa assaje…
Chist' è ll'ammore ca ce 'ncatenaje!
Chist' è ll'ammore ca nun torna cchiù!
'O ssaccio, sta 'nfestino
E nun lle 'mporta 'e me ca, a 'stu puntone,
Faccio 'a figura 'e 'n'ommo fatto a vino.
Invece io stongo ccà 'mbriaco 'e passione!

Nun sò cchiù guappo! Teccove 'o curtiello…
No! Nun v' 'o voglio dà; me serve ancora…
Essa è spusata? 'A quanto? 'A 'n'ora? 'A 'n'ora?
Ma dint' ô lietto nun se cuccarrà!
D' 'o sposo nun me 'mporta…
Mò saglio comme fosse 'nu 'mmitato…
Dimane ognuno dice: – 'A sposa è morta!
– È stata accisa? – 'A chi?
– D' 'o primmo 'nnammurato!