Guardame buono e scrive:
"Capille anella anella,
Uocchie nire e spressive…"
Eppure… nun sò bella.
Scrive ca 'o core mio
Canosce sulo ammore,
E squaglia p' 'o gulio,
P' 'o bbene 'e 'n'atu core.

Passa e me vasa 'nfronte
Ll'aria fresca e nuvella…
Eppure… nun sò bella:
Nun m'avarria vasà.

Scrive ca sulamente
Quann' era piccerella
Ce steva – e 'a tengo a mmente –
Chi me chiammava bella!
Che tiempe d'allegria!
Gioja ca maje cchiù vene!
Chell' era mamma mia
Ca me vuleva bbene…

Tu, no… tu nun me cure…
Ll'hê ditto a chesto e a chella…
'O ssaccio: nun sò bella:
E scriveme accussì…

Truovete nenne assaje,
Fanne 'na catenella,
Ma nun ne truvarraje
Comm' a chi nun è bella!
Si 'ntennere putisse
'Na lacrema d'ammore,
E scennere 'a vedisse,
'Ncopp' a addò sbatte 'o core,

Allora diciarisse:
"Tu chiagne? Oh! Puverella!
Maje t'aggio vista bella
Comme te veco mò!"