Neapolitan Songs - Nun me vuò bbene!

Nun me vuò bbene!

(1908)

music: Ernesto De Curtis,
lyrics: Antonio Barbieri.
Instrumental version


Ma pecché nun me vuò bbene?
Ma pecché sì 'ndifferente?
Chesti lacreme cucente
Nun te smoveno a pietà?
Chistu core n'arreposa,
Suda spaseme e suspire.
'Sta freddezza toja m'accire!
Sì, m'accire! Oi Carulì!

Carulì! Carulì!
Ma pecché? Ma pecché
Nun me vuò bbene?
Ma pecché? Ma pecché?
Oi Carulì!

Nun me tiene manco mente…
Nun me dice 'na parola…
'Nu surriso che cunzola
Nun ll'hê dato maje pe' mme!
Comm' a 'n'albero, ch' a vvierno
Una a una perde 'e ffronne,
'E speranze e tutt' 'e suonne
Me faje perdere accussì!

Carulì! Carulì!
Ma pecché? Ma pecché
Nun me vuò bbene?
Ma pecché? Ma pecché?
Oi Carulì!

I' te cerco 'nu favore,
Pe' 'na vota sulamente,
Tu dimmello finalmente
Ca vuò bbene sulo a mme!
Che te costa 'na buscia?
Pe' 'st'ammore… pe' 'sta freva
Chistu core se sulieva
Pe' 'nu poco, oi Carulì!

Carulì! Carulì!
Ma pecché? Ma pecché
Nun me vuò bbene?
Ma pecché? Ma pecché?
Oi Carulì!