L'ultimo funnaco
Sta scumparenno,
'Sta gente 'e Napule
Pò risciatà.

Coro: Ah! Ah! Ah! Ah!

'O sole, l'aria
Stanno trasenno
'Nfì addò murevemo
Tant' anne fa!

Coro: Tant' anne fa!

Tutt' è adduruso, tutt' è lucente,
E se fatica, se spera e canta.
Si 'mmiez' 'e guappe
D' 'e tiempe antiche,
Si 'mmiez' 'e nenne
D' 'e tarantelle,
Turnasse ancora Pulecenella,
Dicesse: Popolo,
Quant' è cchiù bella
Napule 'e mò!

'Sta "Litoranea"
Che cosa bella!
Ciardino 'e Napule,
Sciore d'està!

Coro: Ah! Ah! Ah! Ah!

Se sceta 'o "Buvero"
Cu 'a "Marenella";
Risorge 'o "Carmene"
Cu 'a "Sanità"!

Coro: Cu 'a "Sanità"!

Napule d'ogge: suonno affattato!
Salotto scicco p' 'e 'nnammurate!
Si 'mmiez' 'e guappe
D' 'e tiempe antiche,
Si 'mmiez' 'e nenne
D' 'e tarantelle,
Turnasse ancora Pulecenella,
Dicesse: Popolo,
Quant' è cchiù bella
Napule 'e mò!

E tu, cchiù tennera,
Pecché 'sta mano
Me faje, strignennome,
'Mpietto tremmà…

Coro: Ah! Ah! Ah! Ah!

'Ncopp' a Pusilleco,
Doce e luntano,
'Nfra 'o mare e l'albere,
T'aggi' 'a vasà!

Coro: T'ha da vasà!

Napule d'ogge: semp' è 'a serena,
Ca 'mmiez' 'o mare canta 'e ccanzone!
Si 'mmiez' 'e guappe
D' 'e tiempe antiche,
Si 'mmiez' 'e nenne
D' 'e tarantelle,
Turnasse ancora Pulecenella,
Dicesse: Popolo,
Quant' è cchiù bella
Napule 'e mò!