'O vverde è 'a speranza 'e tanta gente,
E tuttequante campano 'e speranza;
E sulamente io nun spero niente
E cerco 'e stà cujeto e niente cchiù.

Fronn' auliva mia,
'A pace i' sulo voglio,
Pecché 'sta gelusia
Me vò fà 'ntussecà!

'Na vota 'na speranza aggiu tenuta:
E comm' â stella cade 'a mmiez' ô cielo
'A dint' ô core mio accussì è caduta
E nun ce vene, e nun ce torna cchiù!

Fronn' auliva mia,
'A pace i' sulo voglio,
Pecché 'sta gelusia
Me vò fà 'ntussecà!

Chi tene 'a 'nnammurata e sta luntano,
Se sente 'o core dint' a 'na tenaglia;
Se pò le stà vicino e a mano a mmano,
'A gelusia l'afferra sempe 'e cchiù!

Fronn' auliva mia,
'A pace i' sulo voglio,
Pecché 'sta gelusia
Me vò fà 'ntussecà!