Che bellezza è 'stu cielo 'e matino,
'Na delizia è 'stu mese d'Abbrile;
'Mmiez' a tutte 'sti rrose 'e ciardino
Sto scetato e me pare 'e durmì!

Uocchie comm' a 'stu cielo,
Vocca comm' a 'sti rrose,
Quanta suspire e vase
Vuje v'arrubate 'a me!…

Tu sì bella e cchiù bella te veco
'Nnanz' a 'st'uocchie ca tengo 'nzerrate…
Tutt' addore 'e 'sti rrose sciuppate
Dint' ê vvene m' 'o ssento 'e trasì!

Uocchie comm' a 'stu cielo,
Vocca comm' a 'sti rrose,
Quanta suspire e vase
Vuje v'arrubate 'a me!…

Ma 'sti rrose, ch' a ppoco sò nate,
Nun sò cchiù chelli rrose 'e 'na vota,
Comm' ê ssere d' 'e tiempe passate
Chelli rrose sò morte pe' mme!

Uocchie comm' a 'stu cielo,
Vocca comm' a 'sti rrose,
Quanta suspire e vase
Vuje v'arrubate 'a me!…