Matalè!

(1895)

music: Vincenzo Valente,
lyrics: Salvatore Di Giacomo.
Instrumental version


Matalè, tu 'o bbì ch' ê fatto?
T'ê scusuto 'o stivaletto:
Viene ccà, quanto te metto
Io 'nu punto addò ce vò.

Sò scarparo d' 'o suttile,
Sò priciso e tutt' 'o ssanno,
E po', 'ncapo e 'mpede ll'anno,
Servo 'a primma nubiltà.

Viene ccà!…
Meh… viene ccà!
Ce stongh' i' p'arreparà.
Ma che faje, te miette scuorno?
E 'stu scuorno mò ched'è?
(Coro)
Matalè! Matalè! Matalè! Matalè!
(Solo)
Matalena! Matalè!
(Coro)
Matalè! Matalè! Matalè! Matalè!
(Solo)
Matalena! Matalè!

Miette 'o pede 'ncopp' 'a seggia
Stienne 'a gamma e scorcia 'a vesta,
Quanto veco 'sta fenesta
Si sò buono a rebazzà.

Meno male, è cosa 'e niente,
Quatto botte e tutto è fatto,
Ma mettimmoce pe' patto
Ca p'accunto aje da restà…

Viene ccà!…
Meh… viene ccà!
Ce stongh' i' p'arreparà.
Ma che faje, te miette scuorno?
E 'stu scuorno mò ched'è?
(Coro)
Matalè! Matalè! Matalè! Matalè!
(Solo)
Matalena! Matalè!
(Coro)
Matalè! Matalè! Matalè! Matalè!
(Solo)
Matalena! Matalè!

E p'accunto essa è rummassa:
Vene 'a ddoje, tre vvote 'o mese,
E io fatico e pavo 'e spese
P'amicizia e pe' buntà.

– Ma che faje? – lle dico spisso –
Io te coso e tu te scuse?
Io rebazzo e tu spertuse?
Ma che cancaro vuò fà?

Viene ccà!…
Meh… viene ccà!
Ce stongh' i' p'arreparà.
Ma che faje, te miette scuorno?
E 'stu scuorno mò ched'è?
(Coro)
Matalè! Matalè! Matalè! Matalè!
(Solo)
Matalena! Matalè!
(Coro)
Matalè! Matalè! Matalè! Matalè!
(Solo)
Matalena! Matalè!

Vuò sapè che nc'è de nuovo?
Matalè, mme sò stracquato:
Sora mia, trovete a 'n'ato,
Fatte a 'n'ato guvernà.

Piezz' 'e sola cchiù nun tengo,
Troppo spavo aggio già strutto,
Sò rummasso asciutto asciutto,
E m'allento a faticà…

Che buò fà?
Tu, che buò fà?
Siente a mme, lassammo stà.
S'è scusuta 'n'ata scarpa?!…
E che buò?… Levete, lè!…
(Coro)
Matalè! Matalè! Matalè! Matalè!
(Solo)
Chest' è troppo, Matalè!…
(Coro)
Matalè! Matalè! Matalè! Matalè!
(Solo)
Chest' è troppo, Matalè!…