Quas' è 'n'anno ca passo 'sta vita
Suspiranno pe' 'st'uocchie birbante,
I' te guardo speruto e me 'ncanto.
'St'uocchie belle me fanno murì.

Pe' 'sti ttrezze, 'sta vocch' 'e curallo,
'Sta faccella culore d' 'e rrose,
Tu nun saje, Marì, quanta ccose
'A guardarte me mett' a penzà.

Bella d' 'e bbelle, cor' 'e 'stu core,
Vit' 'e 'sta vita, pozzo sperà?
Ca mentre duorme, dint' a cuntrore,
Si me t'accosto te faje vasà?

Pe' 'nu juorn' aunito cu ttico
I' farria trent'anne 'ngalere
Sotto chiav' addò luce 'un se vere
I' vurria 'sta vita fernì.

Tu po' 'nvece me guard' e ne ride
'E 'sti strazie 'e 'stu core malato
Ma pecché? Ma pecché tu sì 'ngrata?
Sì cuntent' a vederme suffrì.

Bella d' 'e bbelle, cor' 'e 'stu core,
Vit' 'e 'sta vita, pozzo sperà?
Ca mentre duorme, dint' a cuntrore,
Si me t'accosto te faje vasà?

I' patesco; e tu sì 'ndifferente,
Si te parlo nun siente, me fuje.
Nun 'o vide 'st'ammore me struje
Lento, lento?… M'accide, Marì…

O sì fredda, cchiù fredd' 'e 'nu marmo?
O hê fatt' 'e pepierno 'stu core…
Ca si no caparrisse 'st'ammore
E sentisse quann' i' stong' a ddì.

Bella d' 'e bbelle, cor' 'e 'stu core,
Vit' 'e 'sta vita, pozzo sperà?
Ca mentre duorme, dint' a cuntrore,
Si me t'accosto te faje vasà?