Scetate!
Scetate,
Bella ca staje durmenno!
È tantu tiempo ca 'na serenata,
Cantata 'a dint' ê varche
Cu 'a voce 'a cchiù 'ntunata,
Nun se senteva 'a sera.
E 'o cielo, ll'aria, 'o mare
Vonno sentì a cantà.

Napule,
Suspiro 'e tutt' 'o munno,
Te 'ntennerisce autunno,
Te spampanea ll'està…
E pure quann' è vierno
Pare ca è primmavera…
Sì sempe triste e allera,
Faje chiagnere e cantà!

Volano!
Volano
Sott' a 'stu cielo 'e stelle
E pareno palomme viaggiatore
Ca, doppo tantu tiempo,
Songo turnate 'a fore
P' 'a gioja d' 'e 'nnammurate
C'avevano perduto
'A voce e 'a giuventù!

Napule,
Suspiro 'e tutt' 'o munno,
Te 'ntennerisce autunno,
Te spampanea ll'està…
E pure quann' è vierno
Pare ca è primmavera…
Sì sempe triste e allera,
Faje chiagnere e cantà!

Napule!
Napule!
Che vuò, Napule mia?
Serenatelle a suono 'e manduline,
'E coppie 'e 'nnammurate
Sperdute 'int' ê ciardine
E dint' ê varche a mare?
Tutto te da ll'Ammore,
Chello ca vuò te da!

Napule,
Suspiro 'e tutt' 'o munno,
Te 'ntennerisce autunno,
Te spampanea ll'està…
E pure quann' è vierno
Pare ca è primmavera…
Sì sempe triste e allera,
Faje chiagnere e cantà!