Neapolitan Songs - Maggio m'ha scritto

Maggio m'ha scritto

(1926)

music: Vincenzo D'Annibale,
lyrics: Libero Bovio.
Instrumental version


Maggio m'ha scritto ca nce vò truvà
Quann' è dimane,
Cu 'e mmane 'mmano,
For' a 'na loggia,
Sott' ô grillaggio.
E ca te vò purtà rose e ccerase
Abbasta ca nun staje c' 'o musso appiso.

Si no nun ssaje che ffà?
Nce trova cuntrastate, e se ne va!

E pe' dispietto se retira 'o sole,
Sfronna 'e ciardine, fa murì 'e vviole,
E p' 'e nuvanta juorne 'e Primmavera
Nce stenne 'ncuollo a nuje ll'ombra d' 'a sera.

Maggio m'ha scritto ca te vò truvà
Fresca e addurosa
Comm' a 'na rosa,
Cchiù culurita,
Ma no pittata.
Cu 'a trezza longa e 'a vesta 'e percallina,
"Non da sciantosa, ma da Signorina".

Ma si te faje truvà
Cu 'e gramme 'a fora, piglia e se ne va.

E pe' dispietto se retira 'o sole,
Sfronna 'e ciardine, fa murì 'e vviole,
E p' 'e nuvanta juorne 'e Primmavera
Nce stenne 'ncuollo a nuje ll'ombra d' 'a sera.

Maggio m'ha scritto ca l'hê 'a suspirà
Cu 'a meza voce,
'Ntunata e ddoce,
Tutt' 'e ccanzone
Napulitane.
Le vuò cantà Valencia? Ih, che curaggio!
E tiene 'o core 'e fà 'st'offesa a Maggio?!

E nun 'o ssaje che ffà?
Se scoccia, se disturba e se ne va.

E pe' dispietto se retira 'o sole,
Sfronna 'e ciardine, fa murì 'e vviole,
E p' 'e nuvanta juorne 'e Primmavera
Nce stenne 'ncuollo a nuje ll'ombra d' 'a sera.