Napule!
Stasera, senza stelle e senza luna,
Nun me puorte sfurtuna,
Pecché 'stu core mio triste e scuntento
S'arraccumanna ô viento,
Ca 'sti lacreme amare addà purtà
A chi luntana va!

Luntananza!
Se ricorda e se spera, ma se more,
Se more chiano chiano pe' 'n'ammore;
Se spera: turnarrà,
Ma 'o core chiagne e dice: "Nun ce sta!"

Tornace!
Pusilleco t'aspetta pe' 'sta via:
O scen' 'e gelusia,
O vase doce e suon' 'e manduline,
E ll'onne a nuje vicine
Contr' 'e scoglie spezzannose – chi sa! –
Comm' 'a felicità!

Luntananza!
Se ricorda e se spera, ma se more,
Se more chiano chiano pe' 'n'ammore;
Se spera: turnarrà,
Ma 'o core chiagne e dice: "Nun ce sta!"

Sientela
Chesta canzona mia senza speranza
Comm' a 'sta luntananza,
Ch' a 'stu destino tujo cchiù me 'ncatena
E tu me daje 'sta pena,
Chesta smania sultanto pe' sapè
S'io soffro comm' a tte!

Luntananza!
Se ricorda e se spera, ma se more,
Se more chiano chiano pe' 'n'ammore;
Se spera: turnarrà,
Ma tutto, attuorno, dice: "Nun ce sta!"