Ll'addio

(1923)

music: Nicola Valente,
lyrics: Libero Bovio.
Giulietta Sacco
(1944 – 2022)


Che m'hê purtata a ffà cu tte stasera?
T'avevo ditto: "Che me puorte a ffà?"
I' tengo 'a faccia janca cchiù d' 'a cera
E tu nun tiene 'a forza 'e me parlà…

Pusilleco!
– mandulinata 'e Napule
sunata d' 'e ssirene… –
Che m'hê purtata a ffà 'ncoppo Pusilleco,
Si nun me vuò cchiù bbene?!…

'O ssaccio, nun sì tu, ninno mio d'oro,
È 'o core tujo ca nun me cura cchiù;
Ma nun avè paura ca, s'i' moro,
I' nun 'o ddico ca sì stato tu!

Pusilleco!
– mandulinata 'e Napule
sunata d' 'e ssirene… –
Che m'hê purtata a ffà 'ncoppo Pusilleco,
Si nun me vuò cchiù bbene?!…

Stasera quanta stelle! E quanta vvoce
'Ncopp' 'e chitarre tornano a cantà…
Anema mia, pecché me miette 'ncroce?
Turnammoncenne… Che facimmo ccà?!

Pusilleco!
– mandulinata 'e Napule
sunata d' 'e ssirene… –
Che m'hê purtata a ffà 'ncoppo Pusilleco,
Si nun me vuò cchiù bbene?!…