Luntana staje. Natale sta trasenno,
Che bellu friddo… che belli jurnate…
Friddo ô paese tujo ne sta facenno?
Pe' Natale ve site appriparate?…

Luntana staje. No, siente, nun è overo,
T'aggio ditto 'a buscia… Chiove a zeffunno…
Me s'astregneno 'o core e lu penziero,
Nun ce vurria stà cchiù 'ncopp' a 'stu munno…
Luntana staje… Natale sta trasenno…

Ah, che malincunia sulo penzanno
Ca fa tant' acqua e nun te sto vicino…
Pe' nascere e murì 'na vota ll'anno
Che brutto tiempo sceglie 'stu Bammino.

Basta, che ffaje? Di': che te dice 'o core?
Agge pacienza… I' scrivo e scasso doppo.
Nun tengo 'a capa… Te manno 'stu sciore…
Astipatillo 'int' 'a stessa meloppe.
Luntana staje… Natale sta trasenno…