Ammore mio, tiranno,
Te sì scurdata 'e me;
Se n'è passato 'n'anno,
Ma i' penzo sempe a tte.

Nun m' 'o credevo maje
Ca me facive chesto…
Me faje murì cchiù priesto
Pe' vulè bbene a tte.

Stella 'argiento,
Tu chiagne e cante, ma essa 'un te sente,
Ammore tujo se l'ha purtato 'o viento.

Stella d'oro,
'A sciorta mia è ghiuta 'nfunn' 'o mare,
Pe' vulè bbene a essa i' mme ne moro!

È 'n'anno già ca i' sbatto,
Ca i' chiagno comm' a cchè;
Dimme che t'aggio fatto,
Pecché nun tuorne a mme?

Ammore mio luntano,
Te n'ha purtato 'o viento…
M'hê fatto 'o tradimento
Ma i' nun mme scordo 'e te!

Stella 'argiento,
Tu chiagne e cante, ma essa 'un te sente,
Ammore tujo se l'ha purtato 'o viento.

Stella d'oro,
'A sciorta mia è ghiuta 'nfunn' 'o mare,
Pe' vulè bbene a essa i' mme ne moro!