Giesummina p' 'a strada sulagna
Riturnava già stanch' 'e fatica,
Affannanno saglieva 'a muntagna,
Nun teneva cchiù gamme 'e saglì!

E 'ntramente saglieva, saglieva
'Na canzon' 'a luntano sentette,
Se fermaje… e stunata capette!…
'Sta canzona diceva accussì:

– Giesummina, Giesummina,
Tu sì nata 'a 'na riggina,
Rigginella nun sì cchiù,
Zappa 'a terra pure tu!…
Chistu sciore prelibato,
Giesummina, mò s'è seccato,
Tore tujo nun torna cchiù!…
E si torna 'un te vò cchiù!…

Giesummina, p' 'o forte delore,
Rummanette svenuta llà 'nterra,
Chi cantava 'a canzon' era Tore,
Che 'nghiantata l'aveva accussì…

Chillu 'nfame c' 'o core d' 'o pietto,
Cu maniera nce aveva sceppato,
Nun cuntento l'aveva jettato
E, 'nfamone, cantava accussì:

– Giesummina, Giesummina,
Tu sì nata 'a 'na riggina,
Rigginella nun sì cchiù,
Zappa 'a terra pure tu!…
Chistu sciore prelibato,
Giesummina, mò s'è seccato,
Tore tujo nun torna cchiù!…
E si torna 'un te vò cchiù!…

Giesummina credett' a ll'ammore
E cadette 'int' 'a rezza d' 'o 'nfame!
Tene ferma 'na spada 'int' 'o core,
Chiagne sempe e cchiù sente 'e penà!…

Puverella, sta bona malata
Cu 'na tosse, e nun trov' arricietto…
Essa zompa ogne tanto 'int' 'o lietto,
Chella voce le pare 'e sentì:

– Giesummina, Giesummina,
Tu sì nata 'a 'na riggina,
Rigginella nun sì cchiù,
Zappa 'a terra pure tu!…
Chistu sciore prelibato,
Giesummina, mò s'è seccato,
Tore tujo nun torna cchiù!…
E si torna 'un te vò cchiù!…