Purtaje 'stu core mio p'ogne paese:
Tuzzuliaje 'stu core a tanta case.
Nun lle mancaino femmene curtese:
– Ah, sì napulitano? E trase, trase!
E nn'ha araputo paravise 'nchiuse
'Stu core ca giraje tanta paise!

Ma, gira quanto vuò…
Femmene comm' 'e nnoste?
Ah, nun ne truove, no!

Core napulitano sempre trova:
Perciò 'stu core mio sempe truvava
P'ogne paese 'nnammurata nova,
Ma cu nisciuna maje se 'ncatenava
E i' ll'assaggiaje comme s'assaggia ll'uva:
N'aceno, e passa! E niente me piaceva…

Va', gira quanto vuò…
Femmene comm' 'e nnoste?
Ah, nun ne truove, no!

E mò 'stu core, ca 'a luntano vene,
Vò 'a nenna ca si vasa ll'appassiona!
Ma 'a vò ca tene fuoco dint' ê vvene
E – nun lle 'mporta – malamente o bona,
Canta pe' Rosa, more pe' Nannina,
Torna a campà vedenno a Matalena.

Va', gira quanto vuò…
Femmene comm' 'e nnoste?
Ah, nun ne truove, no!

Ah, nun ne truove, no!