Surdato?… e sò surdato!
Ma dint' a chistu core
'Nu sentimento, ammore
Cchiù a niente fa penzà!
E m'accumpagna e parla
Ogne mumento, ogn'ora,
Chest'anema, si ancora,
'A te luntano sta!

Luntano…
E veco 'e lucere
Dint' a 'sta fantasia…
'Na lacrema, 'na mana,
Stracquata 'e salutà!
E chiagno…
E penzo: Napule!…
Paese bello mio!…
E 'sta tristezza nun me fa arrepusà!

'A sera, quanta stelle…
Che luna 'int' 'a nuttata!…
Chi penza 'a 'nnammurata…
Chi 'a mamma sta a chiammà!
Si dormo, dint' 'o suonno,
'Nu desiderio 'e bbene
Me sceta… e quanta pene
'Ammore tujo me dà!

Luntano…
E veco 'e lucere
Dint' a 'sta fantasia…
'Na lacrema, 'na mana,
Stracquata 'e salutà!
E chiagno…
E penzo: Napule!…
Paese bello mio!…
E 'sta tristezza nun me fa arrepusà!

Cumpagno ca me guarde
Speruto, a me vicino,
Pigliammo 'o mandulino,
Mettimmoce a sunà!
Napule nce 'ncatena…
Cantammo sule nuje…
Chiagnimmo tutt' 'e dduje…
Ma chi nce pò capì.

Luntano…
Vedimmo 'e lucere
Dint' a 'sta fantasia…
Ddoje lacreme, ddoje mane,
Stracquate 'e salutà!
E chiagno…
E penzo: Napule!…
Paese bello mio!…
Pur' 'a luntano faje chiagnere e cantà!