Nun 'e tuccà!… Sò 'e rrose d' 'a Madonna,
E nun t' 'e voglio dà…
Nun sì degna 'e addurà manco 'na fronna
'E chesti rrose ccà.

Comme sò belle! Tutte rrose janche
C'aggio cugliuto i' stesso 'int' ê ciardine,
E tengo ancora 'e mmane rosse 'e sanghe
Tante d' 'e spine.
Nun 'e tuccà!
Nun 'e tuccà!

Nun 'e sfrunnà, ca Dio tutto perdona,
Ma no 'sta 'nfamità.
'Ncuollo a mme – me sto zitto – sì 'a padrona,
Ma 'e rrose lass' 'e stà!

Avemmaria… Nun siente 'e ccampane?
Passa 'a Madonna d' 'a Parrocchia mia…
Ma i' tengo 'nu curtiello dint' ê mmane…
Avemmaria!
Nun me tentà!
Nun me tentà!

'Nnucente i' sò… pecché nun sò stat'io…
Sì stata stessa tu!
Senz' 'e te comme faccio, ammore mio?
E comme campo cchiù?

Fredda è 'sta vocca… e i' mò te chiammo "gioja"
Mò ca te veco 'int' a 'na macchia 'e sanghe…
E 'ncuollo a tte 'sti rrose, ca sò 'e toje,
'Sti rrose janche
Ll'aggi' 'a sfrunnà!
Ll'aggi' 'a sfrunnà!