'A mamma ha ditto: "Oje nì, saje che te dico?
È strappatella e nun capisce ancora.
Te tratta, ch'aggi' 'a dì, comm'a 'n'amico,
Meglio 'e 'n'amico, comm'a frate e sora.

È piccerella!
È 'n'anema 'nnucente
E nun capisce niente".

È piccerella e, intanto,
Saccio sul'io chello ca dice 'a ggente.
Ma 'a mamma dice ch'è 'na piccerella
E i' dico appriess' â mamma: "È piccerella!"

"E ll'hê purtato 'a veste?" "E sissignore,
'Na veste 'e seta. E chiste sò 'e scarpine.
Chist'è 'o cappiello, ch'è venuto 'a fore,
Rrobba 'e Parigge, e chiste sò 'e ricchine".

E 'a mmamma dice:
"Mò pare cchiù bella,
Povera piccerella".

È piccerella e, intanto,
Saccio sul'io chello ca dice 'a ggente.
Ma 'a mamma dice ch'è 'na piccerella
E i' dico appriess' â mamma: "È piccerella!"

Ma che ato vò?… Nun è cuntenta ancora?
Che mm'aggi' 'a levà cchiù?
Scuorno a 'sta faccia.
Marcia alla moda, spenne, fa 'a signora
E a mamma mia nemmeno 'na petaccia.

E i' zitto, caccio sempe.
E tanno è bello,
Quanno caccio 'o curtiello.

È piccerella e, intanto,
Saccio sul'io chello ca dice 'a ggente.
Ma 'a mamma dice ancora: "È piccerella!"
E i' dico appriess' â mamma: "È piccerella!"