Ma c'hanno miso 'e scelle
Stanotte tutt' 'e stelle?
Pareno palummelle…
Chi vola 'a ccà,
Chi vola 'a llà…

E 'a luna pare 'a mamma
'E tutte 'sti ppalomme;
Triste e pallida s' 'e chiamma
Tutte a nomme,
Tutte a nomme:
Meh, venite 'a ccà!
Meh, venite 'a ccà!

Ma sò stelle e sò palomme:
Sò palomme 'nnammurate,
Ca, lucente e spenziarate,
Vonno vulà…
Vonno vulà…
Vonno vulà!…

E i' ca mm' 'e tengo mente,
'Sti stelle 'mpertinente,
Penzo a chi alleramente
Mò vola 'a ccà,
Mò vola 'a llà.

E penzo a 'n'ata mamma
Guardanno 'sti ppalomme,
E 'sta vecchia pure chiamma
Notte e ghiuorno
'O stesso nomme:
Ma chi sà che ffa?!
Ma chi sà addò sta?!

Ma Palomma sola, sola,
Senza dì meza parola,
Nce lassaje; mò chiagne e vola,
E vò vulà,
E vò vulà,
E vò vulà!…