'E denare d' 'o 'nfinferinfì!

(1924)

music: Vincenzo d'Annibale,
lyrics: Ferdinando Russo.
Mauro Caputo
(1943 - 2017)


Tu te credive ca durava a secule
'A zezzenella 'a guaragnà tesore,
E nun vuliste fà comm' 'a furmicula
Ca penza già p' 'o vierno 'int' 'o calore.

'O palco a San Carlo,
'O quarto a Tuleto,
Ll'oggette 'e brillante,
'O poco 'e sbruffà…
Ma 'e denare d' 'o 'nfinferinfì, d' 'o 'nfinferinfì, d' 'o 'nfinferinfì
Se ne vanno c' 'o 'nfinferinfà, c' 'o 'nfinferinfà, c' 'o 'nfinferinfà!

Scurdannete ch'ajere, 'nzieme a mammeta
Venniveve 'o ccuttone p' 'e cazette,
Vuliste cammenà cu 'a votomobbele
E me parive 'o principe 'a Scaletta!

'O cuoco a pesone,
'E figlie 'o culleggio,
'E mobbele 'e lusso…
Se pò sfarenà!
Ma 'e denare d' 'o 'nfinferinfì, d' 'o 'nfinferinfì, d' 'o 'nfinferinfì
Se ne vanno c' 'o 'nfinferinfà, c' 'o 'nfinferinfà, c' 'o 'nfinferinfà!

T'aggiu 'ncuntrato ajere e stive paletto!
Stive 'nu poco poco sbattutiello…
Ch' è stato 'o fatto? Sta fernenno ll'evera
E se sta sbacantanno 'o carusiello!…

Mò parle 'e sparagne!
'E tiempe sò triste,
Ll'affare nun vanno,
Te vuò retirà?
Ma 'e denare d' 'o 'nfinferinfì, d' 'o 'nfinferinfì, d' 'o 'nfinferinfì
Se ne vanno c' 'o 'nfinferinfà, c' 'o 'nfinferinfà, c' 'o 'nfinferinfà!