'E ccerase

(1888)

music: Vincenzo Valente,
lyrics: Salvatore Di Giacomo.
Antonio
Buonomo


Abbrile, Abbrile! 'Mmiez' 'e ffronne 'e rosa,
Vaco vennenno 'o frutto 'e chistu mese;
Cacciate 'a capa, femmene cianciose,
Io donco 'a voce e vuje facite 'a stesa:
"Frutto nuviello e mese 'e paraviso!
Collera 'ncuorpo a nuje nun ce ne trase…"
'E ccerase!… 'E ccerase!…

Ll'anno passato, 'o tiempo d' 'e ccerase,
Faceva 'ammore cu 'na Purticesa,
Abbascio 'o Granatiello steva 'e casa
E 'a chiammaveno Rosa 'a vrucculosa.
Belli tiempe de lacreme e de vase!…
Ogne lacrema quanto a 'na cerasa,
Ogne cinche minutele 'nu vaso!…
'E ccerase!… 'E ccerase!…

Mò c'aggi' 'a fà? Se sò cagnate 'e ccose,
E m'ha licenziato chella 'mpesa…
È arrivato 'nu legno genuvese
E 'o capitano ha ditto ca s' 'a sposa…
Capitano d' 'o legno genuvese,
Addò t' 'a puorte 'a bella Purticesa?
'E ccerase!… 'E ccerase!…

Cacciate 'a capa, femmene cianciose,
Io donco 'a voce e vuje facite 'a stesa:
'E ccerase! 'E ccerase!… Abbrile è 'o mese
C'uno se scorda meliune 'e cose…
Capitano d' 'o legno genuvese,
A me nun me ne 'mporta ca t' 'a spuse;
Me daje 'na voce a 'n'ato pare 'e mise!…
'E ccerase!… 'E ccerase!…