Comme te voglio amà!

(1887)

music: Vincenzo Valente,
lyrics: Roberto Bracco.
Francesca
Fariello


Comme te voglio amà, muss' 'e cerasa,
Si me te viene a ffà 'mmocca 'na casa!
Te voglio muzzeccà: lu muorzo trase
E assaje cchiù sfizio dà de ciento vase
Ma si lu muorzo po' te fa dulore,
'Nu vaso te lu dò senza rummore.

E cu vasille tiennere, muss' 'e cerasa mio,
De maggio comm' 'a rosa
Ll'ammore nasciarrà.
Si manca quacche cosa,
Neh, chesto po' che ffa?…
'Sta cosa nce 'a mett'io…
Comme te voglio amà!

Comme te voglio amà, manella 'e cera,
Si me te faje tuccà matina e sera.
Te voglio 'nfrucecà dint' a 'stu core
Addò astipato sta 'nu bellu sciore.
E core cchiù nun è, chest'è vrasera!
Trasenno 'mpietto a mme, squaglia la cera.

Ma s'i' te 'nfonno 'e lacreme
D'ammore e de gulio,
Piglia 'stu sciore e, 'nfosa,
Cchiù nun te può squaglià.
Si vuò quacc'ata cosa,
Neh, chesto po' che ffa?…
'Sta cosa nce 'a mett'io…
Comme te voglio amà!

Comme te voglio amà, trezza 'ndurata,
Si me può 'ncatenà 'st'ammartenata!
Attuorno a chi me dà pene e turmiente
Te voglio arravuglià comm' a serpente.
Ma si strignenno po' t'aje da spezzare,
Trezza 'ndurata, no, nun 'ncatenare!

Pe' 'ncatenare e stregnere,
Muss' 'e cerasa mio,
Manella 'e cera janca,
Ll'ammore bastarrà.
Si quacche cosa manca,
Neh, chesto po' che ffa?…
'Sta cosa nce 'a mett'io…
Comme te voglio amà!