'E 'nnammurate meje sò tante e tante
Ca si 'e voglio cuntà songo cchiù 'e ciento.
Ma cu nisciuna sò fedele amante,
Sarraggio 'nfame, ma nun me ne pento.
Io nun me pento pecché 'mmiez' a tante
Nun ce n'è una senza tradimento.

Una chiagne, 'n'ata rire.
C'è chi canta e chi suspira…
'N'ata pare affezionata,
'N'ata bona e 'nnammurata…
Ma… sò femmene? E pirciò,
Si nun te l'hanno fatto,
Te l'hanno fà… guagliò…

Chella che chiagne, nun me fa 'mpressione,
Pure sapenno quanto me vò bbene…
Chella che canta… è pazza p' 'e ccanzone,
Ma nun capisce ch'è suspire e pene…
Nun me fa pena chella d' 'e suspire…
Ma chi m'accide, nèh?… Chella che rire…

Ch'aggi' 'a dì… chella che rire
Cu 'sta risa cchiù m'accire.
Pecché s'io parlo d'ammore
Cchiù se mette 'e buon' umore…
E io già capisco, mò…
Ca, si nun me l'ha fatto,
Me l'ha dda fà… guaglio…

E dalle e dalle… mò, vide 'nu poco,
Nun ride cchiù… mò… chella ca redeva,
Pecché simmo cadute dint' ô ffuoco.
E ce vulimmo bbene… e chi 'o ccredeva…
Chelli resate… embé, chelli resate…
Ce hanno cagnate… Pazze 'nnammurate…

Essa, mò, nun ride e canta,
E manch'io sò stravagante…
Ma redimmo tutt' 'e dduje
Cu 'na risa ca ce sfuje…
Cierti ffemmene… che ssa…
Si nun sì 'nnammurato,
Te fanno addeventà…