'A passiona mia è 'na pacchianella,
Ch' 'e diente janche janche, e schiavuttella;
L'ha fatto 'na schiavona 'o sole 'austo…
'Ncampagna a ffà ll'ammore, nc'è cchiù gusto!
Pacchianè, che buò fà?
Chist'è 'nu sfizio ca m'aggi' 'a fà passà!
Pacchianè, che buò fà?
Chist'è 'nu sfizio ca m'aggi' 'a fà passà!

'O genio mio, po', è 'na sartulella,
Ch'è 'na simpaticona assaje carella;
C' 'a faccia 'e rose ca me pare 'e raso.
T' 'o scipp' 'a dinto a ll'anema 'nu vaso!
Sartulè, che buò fà?
Chist'è 'nu sfizio ca m'aggi' 'a fà passà!
Sartulè, che buò fà?
Chist'è 'nu sfizio ca m'aggi' 'a fà passà!

Ma 'o sentimento mio è 'na munacella;
Vurria murirce 'nziem' 'int' a 'na cella;
Pe' chella capa 'e pezza me ce 'ncanto,
E chist' ammore ca… è ammore santo!
Munacè, che buò fà?
Chist'è 'nu sfizio ca m'aggi' 'a fà passà!
Munacè, che buò fà?
Chist'è 'nu sfizio ca m'aggi' 'a fà passà!
Ah!